toki! mi wile e nasin pona pi toki nanpa lon toki pona. mi kepeken nimi pu taso. ni la mi ken ala toki e nimi san (3), e nimi likujo (7), e ante. mi pilin pona tawa nanpa ni taso:

* wan = 1
* tu = 2
* luka = 5
* mute = 20
* ale = 100

jan li toki e nimi “tu tu” la mi kute li sona e nanpa 4. jan li toki e nimi “tu wan” la mi sona e nanpa 3. jan pi mute suli a li sona sama. mi toki lon ilo Siko kepeken nasin ni la jan li sona e nanpa mi.

nasin ni li pona lukin. taso, o lukin tu. mi wile toki e nanpa 99. nasin ni la nanpa 99 li sama nimi “mute mute mute mute luka luka luka tu tu”. ni li suli ike a! mi wile ala toki e ni. mi toki e ni la jan li ken ala sona e nanpa 99. jan li kute e “… mute, mute, mute, …”. ni li pakala e lawa.

mi toki e nimi “luka wan” la jan li sona e nanpa 6. sama la jan Loman li sitelen e nimi “VI” la jan Loman ante li lukin li sona e nanpa 6. jan Loman li ken sitelen kin e nimi “IV”. jan ante li lukin e nimi “IV” la ona li sona e nanpa 4. taso… mi ken ala toki e nimi “wan luka”. mi tawa e nimi “luka” lon monsi pi nimi “wan” la jan li ken ala sona e nanpa 4. jan li sona e nanpa 6, anu, jan li sona e ijo “wan” pi mute 5. mi wile pana e sona pi nasin nanpa Loman ni la mi wile kepeken nasin ni a.

nasin nanpa Loman li wawa. mi wile toki e nanpa 99 la mi ken toki lili kepeken nasin ni. o lukin! nanpa 99 li sama nimi “wan ale” kepeken nasin ni. nimi “wan ale” li pakala ala li suli pona. kin la nanpa 4 li sama nimi “wan luka”.

lawa pi nasin nanpa Loman li pona (sama toki pona, tawa mi). ni la toki pona li wile e nasin nanpa la toki pona o kama jo e nasin ni. lawa pi nasin nanpa Loman li ni:

  1. nanpa lili li lon monsi pi nanpa suli la o wan e ona. o lukin: nimi “luka (suli) wan (lili)” li sama nanpa 5 + 1 = 6.
  2. nanpa li lon monsi pi nanpa sama la o wan e ona. o lukin: nimi “luka luka (sama)” li sama nanpa 5 + 5 = 10.
  3. nanpa suli li lon monsi pi nanpa lili la o pakala e nanpa suli kepeken nanpa lili. o lukin: nimi “luka (lili) mute (suli)” li sama nanpa 20 - 5 = 15.

lawa ni li lawa ale! mi toki e ni: nasin nanpa Loman li pona li wile lili e wawa sina. nasin ni li pona e nanpa. mi pilin e ni: nasin nanpa Loman li kute e nasin pi toki pona.

o tawa! o musi! o toki!